Le parcos de Redwood

Alberto Mardegan — Sat, 19 May 2012 12:14:00 GMT

Durante le fin de septimana precedente le UDS (Ubuntu Developers Summit), que iste majo eveniva in Oakland, California, io viagiava con alicun collegas al parco national de Redwood, e passava un plen die promenante in le foresta. Como il es prevedibile, io prendeva multe photos, circa 200, le meliores del quales io ha cargate in un album in le galleria. E le plus significative (non necessarimente le plus belle, ma illos super le qual io ha alicun cosa a dicer) es in iste articulo de blog.
Le prime cosa a dicer es que le arbores de Redwood, le sequoia sempervirens (sequoia sempre verde) es grande, ma le photos in le foresta difficilmente succede in communicar le enormitate del plantas, si in le photo il non ha altere subjectos (per exemplo homines) pro comparation.

The Big Tree

Le Big Tree (grande arbore) non sembla multo alte, ma de facto illo es alte 92 metros. In le photo a dextera on pote vider un persona proxime a su base. Le cosa curiose es que multe de iste arbores ha un tronco que par interrumper se improvisemente a un certe altessa; le diametro non diminue gradualmente como in altere arbores. Io suppone, que le arbores se rumpe a causa del vento, ma sovente illes non mori e continua a crescer del punto ubi illos se rumpeva. Vide iste photo, per exemplo:

Infortunatemente io non sape quanto alte ille arbore es, o si illo ha un nomine proprie; ma io lo trova multo remarcabile!

Promenante in le foresta, on trova anque altere plantas curiose: un “bouquet” de sequoias, sequoias de compania, elicoidal, cavate (ma sempre verde!), rigate, e qui sape cosa.
In le vespere le radios del sol que filtrava inter le ramos del arbores creava belle effectos:

Pro retornar a Oakland nos curreva pro alicun horas longe le costiera del oceano Pacific. Le costiera es usualmente montaniose, e le strata curre multo alte proxime al oceano:

(Si vos es interessate in le processo de creation de iste photo, vide un explication in mi blog photographic.) Ma il ha anque alicun punctos ubi illo es plus basse, e il pote anque haber plagias.

Mardy (Posts about Redwood)

Le parcos de Redwood