Quando le finneses es enoiate, illes prende le nave e va a Stockholm (o a Tallinn, si illes non ha multe tempore). In le nave on pote cantar in le karaoke bar,

ascoltar un concerto (o, si on prefere, dansar — no, io non lo prefere!), facer un pauco de gymnastica in le cabina, seder se in un hall a conversar (e possibilemente seder se sur le scalas pro bloccar los), o construer pyramides de lattas cuje contento ha trovate location melior.

Post que iste cruciera esseva organisate per un del meliores gruppos de personas al mundo, le couchsurfers de Helsinki, nos non poteva subtraher nos a tote iste experientias — ben que il me urge declarar que non tote iste activitates esseva anque realisate per me. In Stockholm nos passava circa 8-9 horas, ma nos non esseva tote insimul: de facto, nostre gruppo de 50 personas se divideva in gruppos plus parve e visitava locos differente. Post que io jam habeva vidite le zoo e le museo del Vasa in le curso de mi precedente excursiones, io me adjungeva al gruppo relaxate e simplemente promenava per le citate, photographante toto lo que meritava de esser photographate, e multo plus.

Nos anque habeva tempore pro mangiar in un restaurante in compania del gruppo couchsurfing de Stockholm,

(solmente le tres personas a dextera es parte del CS svedese, le copula a sinistra es de Helsinki; ma obviemente le gruppo es plus numerose que isto :-) ), e pro re-incontrar casualmente un altere gruppo de nos in un boteca de phanta-scientia (scientia fictive):

In le boteca il habeva anque multe filmes korean e japonese que io ha jam habite le occasion de appreciar, lo que ha evitate que io me sentiva un pisce for del aqua.

Le enormitate de photos que io ha prendite es como sempre visibile in le galleria.

Mi salon (iste termino me pare un pauco ridicule, referite a mi appartamento) ha essite augmentate con un nove functionalitate: le studio photographic. Un drappo de lecto o un ample texito pote esser un valente accessorio pro photographias domestic, e un grande mobile pote esser le collocation perfecte pro illo. In mi salon, le mobile que porta le television es alte circa 2 metros e large 2 metros e medie; il non esseva facile trovar un pecia de texito tanto grande a coperir lo, e anque a coperir un parte del pavimento ante a illo. Ma al fin, le recerca ha succedite e nunc in alto al mobile il ha un rolo de texito blanc, approximativemente extense 2,5 metros per 3,5 metros, que pote descender del summitate del mobile e esser un fundo ideal pro photographias. Le addition de accessorios relativemente inexpensive acquirite per le internet de un boteca de Hong Kong, como un umbrella reflectente con su mechanismo de attachamento e un controllo remote infrarubie ha rendite mi equippamento sufficientemente simil-professional pro convincer un bellissime modella russe a posar pro me.

Post que isto esseva mi prime experientia (iste excusa essera valide anque pro le veniente 10 annos) on pote solmente expectar resultatos mediocre, in particular quanto al arrangiamento del lumine e al inquadraturas. Pro isto, io vos consilia de concentrar vostre attention solmente super le modella e vader sin hesitation al galleria.

In un articulo passate io demandava consilios super le serie televisive a reguardar. Io ha recepite plure responsas, sia hic sia in facebook, ma infortunatemente io non succedeva in discarg... ehm! trovar multe del series que on me recommendava. Le series american es facile a trovar, e de facto io initiava a reguardar 24, ma 2 episodios esseva sufficiente pro discoragiar me: le characteres es troppo american e le recitation es exaggerate (a minus que le Americanos vermente se comporta assi, lo que io non exclude). Alora, antea probar Friends, io decideva de experimentar un serie de un altere cultura, e post que io ha crescite con le animationes japonese, ben, al fin retornava a illos. Naruto es un serie de animation in le qual le protagonista es un infante que studia pro devenir un ninja (si, evidentemente in Japon il ha scholas pro devenir ninjas!).

Naruto ha belle musicas e multe characteres que, anque si secundari, es profundemente developpate — mi favorite es Rock Lee, le protagonista de iste clip.
Le serie consiste de multe episodios: io non sape le numero exacte, ma usque nunc io ha trovate 100, e ha arrivate a reguardar 50 de illos. Le episodios es bastante breve, circa 20 minutas cata uno, e quasi sempre se fini in un momento crucial del historia, assi que il es difficile stoppar de reguardar los. Ma io me effortia, e a vices succede.

Alicun dies retro, le maistraatti (le officio del registro) de Helsinki me inviava un lettera pro informar me io, como citatano del Union Europee residente in Finlandia, potera votar pro le electiones del parlamento europee (que essera le 7 junio 2009) in Helsinki, si io informa le maistraatti super iste mi voluntate. Le lettera conteneva un modulo a compilar e a livrar al officio del registro de Helsinki, ma non specificava si isto pote esser facite per posta, o si le lettera debe esser livrate manualmente.

Un altere cosa que le lettera non diceva, ma que io astutamente trovava, es que il es possibile compilar le modulo electronicamente, in un sito internet accuratemente non mentionate in ulle parte del lettera. Le adresse es http://www.suomi.fi/suomifi/english/eservices_and_forms/forms/maist_vrk_8_10/index.html; le sito require que on se identifica per le systema de online banking de proprie banca, e le formulario a compilar es tanto simple que illo non require ulle explication.

Alora, io compilava le formulario in linea e renunciava a augmentar le entropia del planeta in mesura disproportionate.

Io exprime solemnemente mi satisfaction super iste servicio, que in Italia es ancora inimmaginabile!

Mi vita continua a esser plen de emotiones!