Dominica passate, in un momento de follia, io ha cocinate le quarte ciambella. Quando mi parentes veniva a visitar me in augusto, illes me portava un stampo pro ciambellas, dono de mi amita; totevia io ancora non ha osate usar lo, perque io non esseva secur que illo es intendite pro le uso in alte temperaturas (illo es de un material plastic, apparentemente). Le resultato es que le ciambella ha sufferite un grande trauma quando io lo ha removite del olla (italiano: pentola), e se ha rumpite in alicun punctos. Ma ante que isto accideva, io prendeva un photo: Io debe absolutemente consumer le tres ovos que me resta, ante que illos se guasta; assi il non es improbabile que deman io prepara un altere ciambella — iste vices io probara a cocinar lo in le stampo plastic, sperante que le plastica non deveni parte integrante del dulce. :-)

Zeeshan me ha inviate iste ligamine a un articulo que presenta un test pro verificar si tu usa majormente le parte sinistre o dextere de tu cerebro. Vide iste animation: Esque le dansatrice rotea in senso orari o antiorari? Le articulo sustene que si vos vide le dansatrice rotear in senso orari, vos usa majormente le parte dextere del cerebro, e vos usa le parte sinistre si vos lo vide dansar in senso antiorari. Il es possibile vider le dansatrice rotear in ambe sensos, como le test ipse affirma.

Personas qui usa majormente le parte dextere de lor cerebro ha un personalitate tendentialmente sentimental, durante que le sinistres es rational.

Io non crede que iste test ha ulle validitate, perque le maxime parte de mi collegas (includente io) videva le dansatrice rotear in senso orari (lo que significarea que nos es sentimental, e non rational!). De facto, io crede que isto es solmente un joco optic, totevia il es bastante amusante vider como personas vide le mesme cosa e lo interpreta differentemente. Le ambiguitate es debite al facto que le animation es bidimensional, e quando nostre cerebro lo elabora pro construer un imagine tridimensional, illo adde un dimension — ma le direction de illo es absolutemente libere, e lassate al interpretation.

Finalmente mi licentia de guida es preste! Io ha convertite mi licentia de guida italian in uno finlandese, pro un obvie avantage: Eh si! Le licentia es valide usque a 70 (septanta) annos de etate!

Profitante del discontos de fin estate, io ha comprate un bicycletta. Io non sape si io habera le occasion de usar lo ante le primavera del proxime anno, ma isto es un aspecto secundari. Intertanto, io lo ha usate solmente un vice, le sabbato passate, quando in le matino il habeva sol e un temperatura relativemente calide. Io non saperea dicer qual percurso io ha seguite, io curreva per Lauttasaari sin un destination, e de facto per plure tempore io non habeva ulle idea de ubi io esseva. Ma ha retornate a casa con successo.

Post un breve pluvia, con tonitros, le sol ha retornate a splender e a fugar le nubes. Il habeva un meraviliose iride, complete, que vadeva da un extremo al altere del horizonte; infortunatemente illo esseva tanto grande que io non ha succedite a photographar lo integremente. Io ha probate a componer un imagine panoramic, a partir del photos que io ha prendite, con le auxilio del programma hugin, un programma pro Linux que servi a iste scopo. Le programma es optime e non difficilissime a utilisar, ma infortunatemente io non ha prendite le photos exactemente del mesme puncto de vista, e in ultra le nubes se moveva multo velocemente, assi que il es probabilemente impossibile obtener un imagine componite coherente. Alora, contenta vos de un semi-iride... :-)