Post que mi fratre Andrea sempre lamenta le absentia de pluvia (e non solo) ma necuno pote vermente saper si isto es ver, io ha controlate iste matino le previsiones meteorologic pro Tokyo, e ha discoperite le veritate:

Pluvia, humiditate bassissime, tempore ideal.

Io profita del belle tempore estive pro prender quante plus photos possibile; io mesme non volerea poner troppo de photos in le sito, ma post que io los ha... perque non? Io promitte solemnemente que in futuro io va probar a corriger iste situation. Io promitteva que io haberea titulate tote le photos del Japon, e io ancora non lo ha facite; eh... io attende, in le sperantia que vos oblida. ;-)

In le galleria io ha ponite photos de Lauttasaari, que es le parve insula in le qual io vive, e del parco de Kaisaniemi, qui se trova retro al station ferroviari de Helsinki. Io promenava per illo con mi parentes, e post que illes exclamava "bellissime!" pro qualcunque cosa que illes videva, io me sentiva in obligation de photographar lo. Assi, le culpa non es solmente mie.

Le photocameras digital ha multissime avantages super illos mechanic, ma anque un grandissime contro: il es troppo facile premer le button. 174 (centoseptantaquattro) photos in un die non es admissibile! Il non importa qual es le subjecto, ma quando on preme le button del camera on debe esser consciente del facto que al minus un persona (victima) debera reguardar le photo, e probabilemente esser enoiate per illo. E quando le victima coincide con le assassin, le unic cosa que on pote accusar es le arma del delicto. Dicte, facte. Al fin, io ha delite 49 photos, ma publicar 125 photos de lacos e campania finlandese haberea essite un tortura pro mi appassionate lectores (multo plus que leger mi nonsensos in interlingua). Io ha facite un effortio ulterior, ma non ha succedite a descender sub 70 photos; io non poteva reducer le numero ancora, perque il es essential que vos comprende que in Finlandia il ha multe lacos.

Le occasion ha essite un viage que io ha facite con mi patre e mi matre: nos ha prendite un automobile (in rent) e ha viagiate a nord-est de Helsinki, passante per Lahti, Jämsä, Jyväskylä, Mikkeli e retro al base (vide le region in Google maps).

Clicca hic pro vader al album photographic!

Retornate del meraviliose septimana in Japon, io publica le ultime photos; illos es dedicate al Ushiku Daibutsu, un enorme statua de Budda alte 120 metros qui se trova in Ushiku, non troppo distante de Tokyo. Le monumento, completate in le 1995 e actualmente le status le plus alte in le mundo, es construite in bronzo e internemente hospita un sorta de museo con plure altares e multissime parve statuas de Budda que porta le nomine de personas qui ha volite immortalar lor nomine — probabilemente pagante un contribution considerabile. Le photos es in le album Ushiku Daibutsu; il ha etiam un sito official pro le Ushiku Daibutsu, que pare un blog: http://daibutu.net/cgi/news/index.cgi (illo es completemente in Japonese, ma le photos es in interlingua ;-) ).

Pro non transformar mi blog in un mer album photographic (e de mal qualitate), io debe adder un commento plus personal super iste vacantia in Japon. Le prime cosa a dicer es que le blog de Andrella poterea esser considerate un perfecte brochure turistic, perque illo me anticipava multissime aspectos del Japon; assi que io non me sentiva totalmente estranier — e le hospitalitate de Andrea e Loco ha juvate multo pro isto. Un prime cosa a observar (non necessarimente le plus importante) es que le lingua es un barriera plus dur que in le altere paises que io ha visitate: in Finlandia quasi totes parla fluentemente anglese, e multe personas cognosce etiam espaniol, francese o italiano; in Bulgaria le anglese non esseva particularmente popular, ma comocunque functionava, e in omne caso le bulgaro ha multe parolas de origine grec-latin (ben que isto es insufficiente pro un conversation o pro comprender lo que illes dice, il pote esser de adjuta quando on vole demandar alicun informationes); ma in Japon le lingua anglese es quasi incognite, forsan ancora plus incognite que illo es in Italia, e le lingua japonese ha quasi nihil in commun con le linguas europee. Assi que on pote imaginar qual typo de conversationes io habeva con le parentes de Loco, qui non parla italiano ni anglese. :-) Del resto, le character social del japoneses non me pare multo differente de illo del finlandeses: generalmente multo reservate, il es improbabile que illes te parla sin cognoscer te — ma un septimana non es un tempore sufficiente pro declamar iste facto con certessa; lo que es certe, es que in le trainos il es difficile establir un conversation, perque quasi totes le possibile companios de conversation es dormiente o semi-dormiente. Io invidia iste characteristica del japoneses: illes pote dormir instantaneemente, il suffice que illes decide de dormir, e illes dormi. Ubicunque. E il es impressionante que illes se evelia justo ante lor stop del traino! Isto debe esser plus que un coincidentia, ma io non saperea como explicar lo. Un ultime cosa super le japoneses, es que ille pare timide e extrememente gentil e cortese quando illes saluta o regratia. Ma isto non es un surprisa. Le panoramas del Japon es aliquanto extreme: il ha citates con palatios altissime, citates con casas non enorme ma incredibilemente ammassate le un proxime al altere, e campanias quasi deserte. Como jam le blog de Andrea ha documentate amplemente, le flora e le fauna es multo ric, specialmente de parve insectos que forsan esseva popular etiam in Italia, ma que ha disparite quasi totalmente, como le papiliones [it: farfalle].

Io non pote non scriber un linea super le toilettes, que es le pucta de diamante del technologia japonese: immediatemente quando on entra in le cameretta, on audi alicun sonos del qual io ignora le causa, ma que annuncia clarmente que le toilette ha recognoscite que un persona ha entrate, e es preste a servir le. Io non sape qual es tote le functionalitates del toilette, ma io pote testimoniar que le jecto de aqua hygienisante (cuje temperatura es controlabile per le pannello electronic) es un gadget del qual nunc io suffere le absentia: illo deberea esser installate in tote le toilettes del mundo! Ben, le photo a latere probabilemente rende le idea de quando avantiate iste technologia es, e de quanto difficile il pote esser premer le button correcte! ;-)

Io es secur que io deberea scriber multe altere cosas super le Japon, ma isto es lo que me passava per le capite in iste momentos. Non multo; preoccupante, nonne?

In le ultime menses io ha essite terribilemente occupate con le renovation del appartamento; dicer que io ha removite le carta del muros e los ha repicturate non rende le idea del labor que io, con le adjuta de plure amicos, ha complite. Ma io va narrar super isto un altere vice. Nunc io es in Japon, hospite in le casa de mi fratre e Loco, in le proximitate de Tokyo. Io es impressionate per le modernitate del casa e per le cura e le detalios con que illo ha essite construite; le comparation con mi appartamento esserea tanto impare e humiliante que io prefere non pensar lo! Le photos que vos pote vider in le galleria ha essite prendite in le village (difficile definir si illo es un village, un citate, o simplemente un continuo de casas) ubi nos habita, e in Asakusa, un citate con un area turistic plen de templos. Forsan in le dies veniente io habera tempore pro describer brevemente tote le photos; pro le momento, illos es sin description (ma io es secur que vos sapera distinguer un templo de un casa).